«Աշոտ Հովսեփյանը սպիրտը մարզի մեկ այլ բնակչից է գնել, դրան խառնել է միայն ջուր եւ լիմոն». պաշտպան

Արմավիր քաղաքի բնակիչների թունավորման դեպքի առթիվ քննվող քրեական գործով ձերբակալված Աշոտ Հովսեփյանն իրեն ներկայացված կասկածանքի վերաբերյալ դիրքորոշում է հայտնել՝ տալով մանրամասն ցուցմունք:

Այս մասին «Հայկական ժամանակ»-ի հետ զրույցում ասաց նրա պաշտպան Գոռ Գեւորգյանը՝ պնդելով, որ Հովսեփյանը ցորենի գործարանային սպիրտը ձեռք է բերել մարզի մեկ այլ բնակչից, դրան խառնել է միայն ջուր, լիմոն, բայց ոչ մի քիմիական հավելում:

Հիշեցնենք՝ 50-ամյա Հովսեփյանը ձերբակալվել է անվտանգության պահանջներին չհամապատասխանող ապրանքներ իրացնելու կասկածանքով: Օգոստոսի 31-ից սեպտեմբերի 1-ն ընկած ժամանակահատվածում՝ մեկ օրվա ընթացքում, Հանրապետությունում թունավորման դեպքեր գրանցվեցին: Վերջին տվյալներով՝ մարզի 20 դեպքերից 9-ը մահվան ելքով է, մնացած 11 քաղաքացիները բուժօգնություն են ստանում տարբեր բժշկական կենտրոններում: Քննչական կոմիտեն այսօր հայտնեց, որ քրեական գործով նույն կասկածանքով ձերբակալվել է եւս երկու անձ:

Աշոտ Հովսեփյանի պաշտպան Գոռ Գեւորգյանի հետ մեր զրույցը՝ ստորեւ.

— Պարոն Գեւորգյան, ի՞նչ դիրքորոշում ունի  Ձեր պաշտպանյալը կասկածանքի վերաբերյալ, ցուցմունք տվե՞լ է:

— Դիրքորոշում հայտնել է, կասկածանքի շուրջ իր առնչության վերաբերյալ ասել է, որ իրականում զբաղվել է սպիրտից օղի պատրաստման գործընթացով, սակայն ցորենի գործարանային սպիրտը նա գնել է եւ ցուցմունքով նշել է, թե ումից, փորձել է դրանով աջակցել քննությանը, որ եթե տարածման ճանապարհը դա եղած լինի, ապա դեմն առնվի եւ տարածում չստանա: Աշոտ Հովսեփյանն ի սկզբանե անգամ անզգուշության շրջանակում չէր կարող ենթադրել, որ կարող է այդ հետեւանքը առաջացնել, նա ընդամենը մաքուր ջուր եւ բնական լիմոնի մզվածք է խառնել սպիրտին, այսինքն՝ իր ձեռքով է մզել ու խառնել, որեւէ այլ քիմիական հավելում չի ավելացրել, որից կկարողանար հետեւություն անել, որ ստեղծած խմիչքը կարող է լինել թունավոր:

— Սննդի անվտանգության տեսչական մարմնից երեկ մեզ տեղեկացրել են, որ ըստ նախնական վարկածի՝ օղու մեջ մեթիլ սպիրտ է հայտնաբերվել:

— Կարծում եմ, որ այդ կարգի մարմինը այդպիսի նախնական վարկածի շրջանակում իրավասություն չունի նման հայտարարություն անելու, որովհետեւ ՍԱՏՄ-ն այն կառույցն է, որը պիտի փաստերով առաջնորդվի: Որպեսզի իրենց ասածը լինի ճիշտ, պիտի ունենան եզրակացություն, չկա որեւէ եզրակացություն, որով կհաստատվեր սպիրտի միջից Ձեր նշած թունավոր նյութի առկայությունը, իսկ եթե չկա, որեւէ մեկը անգամ նախնական վարկածի շրջանակում չպիտի նման բան ասեր, որովհետեւ անձի անմեղության կանխավարկածն է խախտվում, եւ որովհետեւ արդեն իսկ ունենք մահացած բազմաթիվ անձինք, որոնց հարազատները կարող են գտնվել հուզական վիճակում, իսկ այդ ապատեղեկատվությունը կարող է հակառակ ազդեցությունն ունենալ: Եւ ես չեմ այն մարդը, ով պիտի հուշի այդ կարգի լուրջ կառույցներին, թե ինչ գործելաոճ պետք է դրսեւորեն, որպեսզի էլ ավելի չշիկացնեն արդեն իսկ շիկացված վիճակը:

— Չկա՞ն քրեական գործով ձեռք բերված տվյալներ, որոնք հաստատել են մեթիլ սպիրտի առկայությունը:

— Ոչ, ես հստակ կարող եմ ասել, որ նման տվյալներ չկան, ընդամենը ունեն տվյալներ, որ մահացածներից ոմանց արյան մեջ  է եղել, դա էլ՝ ոչ եզրակացության շրջանակում, որովհետեւ մինչ այս պահը ես, որպես Աշոտ Հովսեփյանի պաշտպան, չեմ տեսել եւ չեմ ծանոթացել գեթ մեկ եզրակացության, անգամ դիակի դատաբժշկական եզրակացության, ըստ որի՝ մահվան պատճառի մեջ նշված կլինի որեւէ թունավոր նյութից թունավորման հետեւանք: Այսինքն՝ եթե չկա նման ինֆորմացիա, այն, ինչ կա, ես կարող եմ անվանել ժողովրդական բամբասանք, որից պետք է հեռու մնան թե նախաքննական մարմինը, թե պետական մարմինները, թե Ձեր նշած տեսչությունը:

— ՍԱՏՄ-ն նշել է, որ փորձաքննություն է նշանակվել, որի արդյունքները պարզ կլինեն 3-7 օրվա ընթացքում:

— Ուղիղ մեկ օրից ավելի է՝ ես շահերի պաշտպան եմ, անգամ մեկ փորձաքննության որոշման հետ չեմ ծանոթացել:

— Պարոն Գեւորգյան, սկզբնակետը, որտեղից Ձեր պաշտպանյալը ձեռք է բերել Ձեր նշած սպիրտը, ո՞րն է եղել:

-Տեսեք՝ ինչ հետաքրքիր է. շղթա է, եւ մեր նշածը ոչ թե սկզբնակետն է, այլ այն անձը, որից ձեռք է բերել, բայց այդ անձը, իմ պատկերացմամբ, չէր կարող լինել ցորենից սպիրտ պատրաստող, պետք է ուրիշից ձեռք բերած լինի, եւ եթե իրականում պարզվի, որ դա է եղել թունավորման պատճառը, բոլորիս է հետաքրքիր՝ սկզբնակետը որն է եղել: Համենայն դեպս, Աշոտ Հովսեփյանը կատարել է իր՝ որպես քաղաքացու բարոյական պարտականությունը, չի օգտվել ցուցմունք տալուց ազատվելու՝ օրենքով նախատեսված հնարավորությունից, տվել է ցուցմունք, ցույց է տվել անձին, ումից որ սպիրտը ձեռք է բերել՝ ունենալով մեկ նպատակ. եթե իրականում դա է եղել թունավորման պատճառը, գոնե այդ շղթան կանխվի: Ու իր տված ցուցմունքի հիման վրա է, որ հայտնաբերվել է այն քանակությունը, որի մասին խոսվում է, հակառակ դեպքում մինչ օրս այդ սպիրտը ոչ մեկը չէր գտնի:

-Աշոտ Հովսեփյանը մարզի կոնկրետ մի բնակչի՞ց է ձեռք բերել դա թե՞ ինչ-որ խանութից, կազմակերպությունից…

— Ինչ-որ անձից, որը զբաղվում է այդ գործով:

— Նա ե՞ւս Արմավիրի մարզից է:

— Այո, Արմավիրի մարզի բնակչից:

— Այսօր ձերբակալվածների մեջ այդ վաճառող անձը մտնո՞ւմ է:

— Ձերբակալվածների հետ կապված մենք հստակ ինֆորմացիա չունենք, բայց տրամաբանում ենք, որ պիտի կապ ունենան:

— Իսկ գնորդների անուններ նշե՞լ է Ձեր պաշտպանյալը:

— Միանշանակ, նշել է այն ծավալով, որքանով հիշել է, տվել է անուններ, անգամ այնպիսի, որոնց մասին մինչ այդ պահը նախաքննական մարմինը չի իմացել:

— Մոտավորապես, քանի՞ հոգի է իրենից գնել, ի՞նչ ծավալի օղի է վաճառել:

— Ծավալի մասին հստակ տեղեկություն չենք կարող ասել, բայց որը հիշել է, որի մասին իմացել է, հայտնել է:

— Աշոտ Հովսեփյանի հարեւանները հայտնել են, որ նա նախկինում էլ է զբաղվել օղու թորմամբ, նման դեպք նախկինում արձանագրվե՞լ է:

-Ես չգիտեմ՝ հարեւաններն ինչ են հայտնել, ինքս նման տեղեկության չեմ տիրապետում, բայց նման դեպք առհասարակ արձանագրված չի եղել, առաջին դեպքն է:

— Տեղեկություն էլ չունե՞ք՝ առաջին անգամ է, որ ինքը տվյալ անձից է սպիրտ ձեռք բերում:

— Հստակ տեղեկություն չունեմ:

— Պարոն Գեւորգյան, վիճարկո՞ւմ եք Աշոտ Հովսեփյանի ձերբակալման իրավաչափությունը:

— Ես համարում եմ, որ ձերբակալումն ապօրինի է, բայց այս պահին իր գործով շատ ավելի կարեւոր հարցերով եմ զբաղված, ենթադրենք՝ վիճարկեի, համարեին ոչ իրավաչափ, դա ոչինչ չէր փոխելու, այդ ժամանակը շատ ավելի ռացիոնալ կարող ենք օգտագործել իր պաշտպանության մեկ այլ բնագավառում:

— Իսկ իր առողջական վիճակն ինչպե՞ս է:

— Շատ վատ է, Աշոտ Հովսեփյանն ունի բարձր աստիճանի շաքարային դիաբետ, եւ նախատեսած կարգով՝ օրը 4 անգամ, շտապօգնություն է գալիս՝ տարբեր չափաբաժնով ինսուլին ներարկելու, այսինքն՝ ոչ թե այն վիճակն է, որ կանչում են, որովհետեւ վատ է, այլ առհասարակ վատ է, բժիշկների հսկողության ներքո:

Оставить комментарий

Ваш адрес email не будет опубликован. Обязательные поля помечены *