Ոչ մի ոստիկան դիմակ չկրող քաղաքացու մոտով անտարբեր չպետք է անցնի. Փաշինյանը՝ ոստիկանապետին

Միտումն անհանգստացնող է և մենք մեր բոլորի և հանրության ուշադրությունը պետք է հրավիրենք այս փաստի վրա, կառավարության այսօրվա նիստում հայտարարեց վարչապետ Նիկոլ Փաշինյանն՝ անդրադառնալով վերջին երկու օրերին կորոնավիրուսով վարակման թվերի աճին։

«Օրինակ, ես երեկ առաջին անգամ մարտ ամսից հետո Երևանում խցանում նկատեցի, թերևս դա կապված է դպրոցների բացման հետ», — ասաց վարչապետը՝ առողջապահության փոխնախարարից հետաքրքրվելով, թե ի՞նչ կարող է ասել այս թեմայով։

«Այս աճը կապված է մինչդպրոցական շրջանի ակտիվացման և տեղաշարժի հետ», — ասաց փոխնախարար Անահիտ Ավանեսյանը։

Նրա խոսքով՝ առաջիկա երկու շաբաթվա ընթացքում կերևա՝ դպրոցների բացումից հետո ինչ արդյունքներ են գրանցվում, ինչպես է ընթանում կորը։

«Պետք է խստորեն պահպանել առկա սահմանափակումները, որպեսզի աշնան ընթացքում չունենանք թվերի կտրուկ վերելք», — ասաց Ավանեսյանը։

Վարչապետն էլ արձագանքեց, թե դիմակի կրման պայմանները պետք է խստորեն պահպանվեն։

«Ոչ մի ոստիկան դիմակ չկրող ոչ մի քաղաքացու մոտով անտարբեր չպետք է անցնի», — ասաց Նիկոլ Փաշինյանը՝ դիմելով ոստիկանապետին։

Оставить комментарий

Ваш адрес email не будет опубликован. Обязательные поля помечены *